Nagpabilin nga dakong hagit sa Bureau of Internal Revenue (BIR) ang pagsiguro nga tanang negosyante sa Pilipinas mosunod sa balaod kabahin sa rehistrasyon ug pagbayad sa hustong buhis.
Base sa datos sa BIR, gikan sa kapin 200,000 ka mga establisemento nga gi-inspeksyon, mga 12 porsyento niini ang wala narehistro. Dugang pa, gibanabana sa Philippine Statistics Authority (PSA) nga kapin sa 1.3 milyones nga gagmay’ng tindahan ug informal vendors sama sa sari-sari store ug tiangge ang wala pa masulod sa tax net sa gobyerno.
Sumala sa BIR, kini nga kakulangan sa compliance nagpasabot ug dako nga revenue loss alang sa nasud nga unta magamit sa mga proyekto sa edukasyon, panglawas, ug imprastruktura. “Ang matag peso nga dili makolekta tungod sa tax evasion, mao kadto ang kwarta nga mawala sa serbisyo publiko,” matod sa usa ka BIR spokesperson.
Aron masulbad ang problema, gipasiugdahan sa BIR ang digital monitoring, surprise inspections, ug awareness campaigns aron mahangyo ang mga negosyante nga boluntaryong mosunod sa balaod. Samtang, nagpangayo usab ang pipila ka business groups nga pasimplehon ang proseso sa buhis ug hatagan og suporta ang gagmay’ng negosyante aron mas mapadali ang formalization.
Gipahimangnoan usab sa BIR nga ang mga negosyong magpadayon nga wala magparehistro ug magpabaya sa buhis posibleng mag-atubang sa penalty, pagpasira, ug kasong kriminal.
Photo Courtesy to:Behace
