Gisulat sa kasaysayan ang kalibutanong paningkamot sa pagpanalipod sa kadagat human makab-ot sa United Nations High-Seas Treaty ang gikinahanglan nga 60 ka ratipikasyon. Tungod niini, mamahimong epektibo ang kasabutan sa unang bahin sa 2026.
Ang treaty, nga opisyal nga nailhan nga Agreement on the Conservation and Sustainable Use of Marine Biological Diversity of Areas Beyond National Jurisdiction, nagtumong sa pagpanalipod ug sustenableng paggamit sa mga kahinguhaan sa kadagatan nga wala masakop sa hurisdiksyon sa bisan unsang nasud.
Ilalom sa kasabutan, kinahanglan nga motuman og environmental impact assessments ang mga proyekto nga adunay dakong epekto sa dagat.
Lakip usab niini ang pagtukod og marine protected areas bisan pa walay hingpit nga konsensus gikan sa tanang miyembro, ug ang patas nga pag-apod-apod sa benepisyo nga makuha gikan sa marine genetic resources.
Matod sa mga eksperto sa kalibotanong kalikupan, ang treaty usa ka dakong lakang sa pagpakunhod sa kadaot sa dagat ug sa pagpanalipod sa marine ecosystems batok sa hulga sa polusyon, sobrang pangisda, ug epekto sa climate change. “Dili lang kini kasabutan, apan usa kini ka baruganan nga nagpakita sa tinud-anay nga panaghiusa sa mga nasud alang sa kaluwasan sa atong dagat,” matod sa usa ka representante sa UN.
Ang bisa niini nga tratado maghatag ug bag-ong baruganan sa global ocean governance ug gilauman nga magpabilin nga dakong paglaum alang sa umaabot nga henerasyon.
Photo courtesy to:Malay mail
