Pipila pa ka bagyo ang naghulga ug gipaabot nga mosulod sa Philippine Area of Responsibility (PAR) karong ‘ber’ months. Sumala sa state weather bureau, adunay kapin siyam (9) ka bagyo nga gibantayan nga mosulod sa nasud sa dili pa matapos ang tuig.
Kalabot kini sa La Niña Alert nga gi-anunsyo sa state weather bureau, diin gipaabot ang 70% o labaw pa nga posibilidad sa pagtungha sa La Niña karong bulan sa Oktubre hangtod Disyembre ug posibleng magpadayon hangtod Pebrero 2026.
Sumala sa Deputy Administrator sa state weather bureau nga si Marcelino Villafuerte, ang posibleng ika-16 nga mahimong bagyo pagatawagon og “Paolo” ug gipaabot nga moabot pa sa 5 hangtod 9 ka tropical cyclone ang mosulod sa PAR hangtod matapos ang tuig 2025.
Bisan pa man wala gilauman nga mas kusgan pa ang mga umaabot nga bagyo kaysa mga miaging bagyo, apan andam gihapon sila sa pagsulod niini, aron malikayan ang mas dako nga epekto o kadaut.
Samtang, gipaandam ni Villafuerte ang publiko nga kanunay mag- andam, ilabi na sa Visayas ug Mindanao tungod kay kini kasagarang maigo sa gipaabot nga mga bagyo.
Photo Courtesy to: AccuWeather
