Gisugyot sa hawanan sa konseho nga mabisita pagbalik ang ordinansa kalabot na sa pagtaod og mga closed-circuit television kon cctv sa mga establisyimento ning syudad sa Cagayan de Oro.
Sa nilabay’ng sesyon daghang natuki nga mga aspeto nga angayang palambuon sa institusyon sa kapulisan labi na ang hisgutanang pasilidad, pag-upgrade sa mga kagamitan, pagtutok sa pagsulbad sa mga krimen, pagpalig-on sa 911 emergency hotline ug ang pagmontar og mga cctv nga dakong tabang diha sa mga imbestigasyon kung adunay mahitabong mga krimen.
Gipunting ni konsehal George Christopher Goking, kinsa chairman sa trade and commerce nga suportado nila ang mga plano sa Cagayan de Oro City Police Office diha sa pagmentinar sa kahusay ug kalinaw sa dakbayan, busa angayan sab nga magpalambo sa ilahang operasyon ang kapulisan aron nga mahimo silang mas epektibo.
Gilakbitan sab sa konsehal ang mga krimen nga nahitabo sa syudad, nga makatabang unta sa pagsolbad kung adunay mga cctv sa nahitabuang mga lugar. Samtang lakip nga tutukan ang saktong pagresponde sa 911 hotline emergency kung asa himuong sumbanan ang ubang mga nasud nga kung ugaling dili na makatubag balik ang mitawag og emergency, posible kining malocate ug maadtuan pinaagi sa Global Positioning System kon GPS
Gihangyo usab ni Konsehal Goking si Acting City Director P/Col. Gerardo Ulanday sa pag-ilis o pagbag-o sa mga sub-standard ug depektosong gamit sa mga police station.
Photo courtesy: Cagayan de Oro City Council
