Kusganong gihimakak ni kanhing House Speaker ug Leyte Representative Martin Romualdez ang pagkalambigit sa iyang pangalan ni Orly Regala Guteza atol sa Senate Blue Ribbon Committee hearing.
Giinsister ni Romualdez nga dili tinuod ang pangangkon ni Guteza nga daghang maleta nga dunay sulod nga kuwarta ang giingong gihatod sa iyang balay, nga nagtawag niini nga walay basehanan ug desperado nga lakang nga ilambigit siya sa giingong kickback.
Gitataw sa kongresista nga imposibleng mahitabo ang giingong paghatod sa kuwarta ngadto sa McKinley niadtong Disyembre 2024, tungod sukad niadtong Enero 2024, gi-renovate ang nasangpit nga propyedad, diin mga construction worker lang ang anaa.
Matod ni Romualdez, bakak nga politikanhong motibo ang maong mga pasangil ug iyang giinsister nga wala gayud siya magluib sa katawhan, nakadawat o nakabenepisyo sa bisan unsang kickback gikan sa proyekto sa gobyerno.
Dugang pa, nga wala siya nagmando o nitugot ni bisan kinsa nga mohimo og aksyon nga makadaot sa katawhan o makadaut sa iyang ngalan.
Gidawat usab niya ang usa ka patas, transparent, ug walay gidapigan nga imbestigasyon, ug kahinumdoman nga siya boluntaryong nibiya sa katungdanan isip House Speaker nga pamatuod sa iyang suporta sa nagpadayon nga imbestigasyon.
Gipasabot ni Romualdez nga nagpakahilom lang siya isip pagtahod sa proseso, apan padayon siyang gibato sa mga malisyosong akusasyon nga walay igong ebidensiya.
Subling gipasabot sa kongresista, nga wala siya nangawat sa pundo sa publiko ug wala siya nangayo og kuwarta sa mga dautang tinubdan.
Photo courtesy to:MSN
