Gibakwit sa Philippine Army ang 38,000 ka mga residente ngadto sa mas luwas nga mga dapit samtang nagpadayon ang Severe Tropical Storm Opong nga mihapak sa lain-laing bahin sa nasud kagahapon, Setyembre 26, 2025
Matud ni Col. Louie Dema-ala, tigpamaba sa Philippine Army, ang mga bakwit gikan sa mga rehiyon sa Southern Luzon, Bicol Region, ug Eastern Visayas nga gihimo uban sa tabang sa Humanitarian Assistance and Disaster Response (HADR) teams sa Army.
Samtang, kapin sa 5,000 ka miyembro sa Citizen Armed Forces Geographical Unit (CAFGU) Active Auxiliary ug mga reservist ang naka-standby alang sa posibleng deployment sa Metro Manila, Luzon, ug Visayas, kung mograbe pa ang sitwasyon.
Sa laing bahin, duha ka Black Hawk helicopter sa Philippine Air Force (PAF) ang gipadala aron sa pagpahigayon og airlift operations sa kapin 800 ka kahon sa relief goods gikan sa Laoag City paingon sa Calayan Island, Cagayan, alang sa mga komunidad nga grabeng naapektuhan sa bag-o lang Super Typhoon Nando.
Nagdeploy usab ang PAF og C-130 aircraft nga nagdala og 1,000 ka family food packs gikan sa Villamor Air Base sa Pasay City paingon sa Basco, Batanes. Ang nasangpit nga eroplano gigamit usab sa pagpauli sa mga nastranded nga indibidwal ug turista sa Batanes sa Pasay.
Ang Severe Tropical Storm Opong, nga nagdala og kusog nga pag-ulan ug hangin, gibantayan sa PAGASA samtang paingon sa kasadpan, nga naghulga sa mas daghang lugar sa Luzon ug Visayas.
Photo courtesy to:INSTAGRAM
