Napalgang patay ang usa ka suspetsado kinsa giingong namusil sa Immigration and Customs Enforcement kon (ICE) field office sa Dallas, Texas nga miresulta sa pagkamatay sa usa ka detainee ug pagkaangol sa duha pa ka mga piniriso.
Sumala sa Department of Homeland Security kon DHS, ang duha ka biktima nga samaran kritikal ang kahimtang ug giatiman karon sa ospital. Ang suspek nga nailhang si Joshua Jahn, 29 anyos, nakapwesto sa atop sa silingan nga building ug didto gipamusil ang pasilidad sa ICE. Human sa insidente, nakaplagan kining wala nay kinabuhi sa samang dapit diin gituohan kining nagpakamatay.
Narekober sa mga imbestigador ang mga basiyo sa bala nga adunay sulat nga “ANTI-ICE”, hinungdan nga gitagad kini isip usa ka “targeted violence.” Tungod niini, gipahugtan sa DHS ang seguridad sa tanang ICE facilities sa tibuok nasud.
Sa laing bahin, mipadayag si Texas Governor Greg Abbott, nga dili kini makapahunong sa ilang kampanya batok sa iligal nga migrasyon ug magpadayon gihapon ang operasyon sa pagdakop ug pagpapa-uli sa mga migrante.
Photo for illustration credits to:wikimedia commons
