Gipasalig ni Senate Finance Committee Chairman Senador Sherwin Gatchalian nga dili nila tugotan nga mabalik ang Ayuda para sa Kapos ang Kita o AKAP Program sa gilaraw nga 2026 national budget.
Kini ang gipahayag ni Gatchalian sa dihang gisusi ang pondo sa Department of Social Welfare and Development (DSWD). Gipasabot ni Gatchalian nga ang AKAP halos pareho ra og matang sa tabang sa Assistance to Individuals in Crisis Situation (AICS), gawas sa materyal ug psychosocial assistance nga AICS lang ang adunay ingon ana.
Gipakita usab ni Senador Gatchalian ang mga nadiskubrehan gikan sa Commission on Audit (COA) nga nag-ingon nga ang AKAP naggahin og mga dili awtorisadong matang sa tabang ug adunay mga indibidwal nga dili kwalipikado nga nakadawat og tabang gikan sa AKAP.
Kahibaluang ang AKAP usa ka inisyatibo sa House of Representatives ug dili sa DSWD. Busa gisugyot ni Senador Gatchalian nga dugangan na lang ang pondo sa AICS imbes nga buhion pag-usab ang AKAP. Nisugot sab si DSWD Secretary Rex Gatchalian, kinsa niingon nga nagdoble lang ang AKAP sa AICS ug niingon nga mosunod sila sa desisyon sa Kongreso.
Dugang pa sa kalihim, aduna pay nabilin nga pondo ang AKAP nga wala magamit karong tuiga. Tungod niini, gitangtang sa Department of Budget and Management (DBM) ang AKAP ug pipila ka proyekto gikan sa DSWD 2026 budget, busa miubos ang budget sa Office of the Secretary sa P221 bilyon gikan sa P362.3 bilyon.
Photo courtesy: DSWD
