Giawhag ni Carl Paul G. Alecante, Senior Agriculturist sa Philippine Coconut Authority (PCA) – Iligan City, Lanao del Norte, ang tanang mga mag-uuma sa lubi sa tibuok probinsya nga magparehistro na sa ilang buhatan aron makadawat sa libre nga mga programa ug serbisyo nga gitanyag sa ahensya.
Sa eksklusibong pakighinabi sa Juander Radyo News Team, gisaysay ni Alecante nga daghan pa sila ug mga programa nga giandam alang sa mga coconut farmers, apan ang unang lakang mao gayud ang pagparehistro.
Lakip sa mga benepisyo nga ilang gihatag mao ang mga ayuda sa panguma, teknikal nga suporta, ug mga health and medical missions alang sa mga rehistradong mag-uuma ug ilang pamilya.
Gipasiugda sa PCA nga mahinungdanon gyud nga magparehistro ang mga mag-uuma, aron masiguro nga maapil sila sa tanang programa nga gitagana alang kanila.
Gihangyo usab sa kadumalahan sa PCA Provincial Office ang mga mag-uuma nga moduaw sa ilang buhatan sa Iligan City alang sa personal nga pagpangayo og tabang ug pag-kumpleto sa registration.
