Pirmado na ni US President Donald Trump ang executive order alang sa rebranding o pag-ilis sa ngalan sa Pentagon ngadto sa Department of War.
Gibuhat sa US President ang pagpirma sa Oval Office sa White House niadtong Biyernes, Setyembre 5, local time.
Sumala ni Trump, mas angay ang bag-ong ngalan sa departamento tungod sa kasamtangang kahimtang sa kalibutan ug gipasigarbo usab niini nga sila adunay labing kusgan nga militar sa tibuok kalibutan.
Sa maong EO, gitugotan ang Secretary of Defense, Department of Defense ug mga subordinate officials nga gamiton ang ikaduhang pagtawag nga Secretary of War, Department of War ug Deputy Secretary of War sa official correspondence, public communications, ceremonial contexts ug non-statutory documents sulod sa executive branch. Halos dali ra usab nga gisugdan sa mga opisyal ang pagpahimulos niini.
Gimanduan usab ang tanang executive departments ug agencies nga ilhon ang bag-ong secondary titles sa internal ug external communications ug gimando ni Defense Secretary Pete Hegseth nga magrekomenda og mga aksyon, susama sa lehislatibo ug ehekutibo, aron permanente nga tawgon ang US Department of Defense nga US Department of War.
Nabantayan usab nga giusab na sa Pentagon officials ang signage sa gawas sa opisina ni Hegseth ingon man usab sa website sa departamento diin nakabutang na ang US Department of War sa ibabaw sa Department of Defense.
Photo Courtesy to:The Pentagon
