Buot ni Senator Raffy Tulfo, ang Bise Chairperson sa Senate Committee on Labor and Employment, nga ipatuman ang managsamang minimum wage alang sa mga trabahante sa Metro Manila ug sa mga probinsya.
Sa pagkakaron, ang sweldo sa mga non-agriculture workers sa NCR anaa sa ₱695 matag adlaw. Layo ra kaayo kini kumpara sa ubang rehiyon sama sa Bangsamoro Autonomous Region in Muslim Mindanao (BARMM) nga ₱411 lamang, ug Caraga nga anaa sa ₱415 matag adlaw.
Atol sa gihimong pagdungog sa komite, gisugyot ni Tulfo sa National Wages & Productivity Commission (NWPC), Department of Labor and Employment (DOLE), ug sa mga labor expert nga tun-an ang iyang sugyot tungod kay ang presyo sa mga palaliton sama sa gasolina, pagkaon, tambal ug uban pa pareho ra man gihapong nisaka tungod sa inflation.
Gani, matod pa ni Senador Tulfo, mas mahal pa gani ang presyo sa gasolina, ang driving force sa atong ekonomiya, sa ubang probinsya.
Nisaad si DOLE Sec. Bienvenido Laguesma nga ilang tun-an ang sugyot ni Senador Tulfo ug mohimo og lawom nga konsultasyon sa mga Regional Tripartite Wages and Productivity Boards ubos sa NWPC.
Photo courtesy:PRESSONE.PH
