Gihigustan karon sa social media sa nasud U.S ang babaye nga si Saskia nga nagabayad ug $80 matag oras aron adunay mogakos ug mokuyog kaniya ilabi na sa mga gabii nga tugnaw ug mingaw.
Si Saskia usa ka hamtong nga babaye nga minyo sa usa ka pulis, apan kasamtangan nga nagapuyo og nag-inusara sa New York tungod sa iyang pagpaningkamot sa pagpadayon sa career isip artista.
Matod pa niya, dili malikayan nga mobati siya og kasubo ug kaguol, hinungdan nga mihire siya og professional cuddler pinaagi sa website nga cuddlist aron makapahupay sa iyang gibati nga kamingaw ug kapoy sa huna-huna.
Nasayran sa bana ni Saskia ang iyang gibuhat apan wala kini magselos, kay para kanila ang importante mao nga maayong pamati sa babaye ug walay sobra pa nga kalihokan gawas sa gaksanay.
Matod pa ni Saskia, sayop ang huna-huna sa uban nga kini mahimong mosangpot og seryosong problema kay limitado lang kini nga serbisyo ug walay labot sa pakighilawas.
Sumala sa mga pagtuon, ang cuddling makatabang sa pagpagawas sa “oxytocin” nga nailhan usab nga feel-good hormone, nga makapadugang sa pagbati sa kalipay.
Apan aduna usab mga kritiko nga nag-ingon nga kini mahimong makadaot sa relasyon sa mga magtiayon ug mosangpot sa pagpanglimbong.
Sa laing bahin, gipasiugda sa maong website nga ang ilang mga cuddler propesyonal ug kabalo sa mga limitasyon sa ilang serbisyo.
Photo courtesy to:WSVN
