Gimando ni Presidente Ferdinand “Bongbong” Marcos, Jr. ngadto sa mga LGU Officials nga isumbong ang mga iregularidad nga proyekto sa gobyerno ilabi na sa mga nasudnon ug probinsyal nga mga pasilidad.
Gisulti kini sa Presidente atol sa iyang pakigpulong human sa oath taking sa mga bag-ong opisyales sa League of Provinces of the Philippines (LPP) nga gipahigayon sa Malacañang.
Kahibaloan nga gikasuko pag-ayo ni Marcos human masuta ang mga “ghost” nga flood control projects sa Bulacan samtang nag-inspeksyon siya sa usa ka riverwall project sa Barangay Piel, Baliuag.
Matod pa sa Presidente, kinahanglan nga siguruhon nga matuman sa hustong paagi ang tanang proyekto sa nasud ug probinsya nga panggamhanan aron dili makurakotan ang katawhan. Dugang pa, gipahinumduman sa Presidente ang mga opisyales nga magserbisyo nga adunay integridad ug konsensya.
Ang LPP kun League of Provinces of the Philippines nagrepresentar sa 82 ka Provincial Government sa nasud, diin si South Cotabato Governor Reynaldo Tamayo Jr. napili pag-usab isip national president ug si Quirino Governor Dakila Carlo “Dax” Cua isip chairperson. Ang ilang termino molungtad hangtod sa Hulyo 31, 2028, base sa Presidential Communications Office.
