Gibawi sa Philippine Contractors Accreditation Board (PCAB) ang lisensiya sa 9 ka construction companies, nga gipanag-iyahan ug kontrolado ni Sarah Discaya, ang usa sa mga nag-unang personalidad nga ginaimbistigahan kalabot sa matud pa, anomalya sa mga flood control project.
Base sa Resolution No. 075, series of 2025 nga gipagawas Setyembre 1, gisulte sa PCAB nga gibawi ang lisensiya sa mga kompanya human giangkon ni Discaya sa pagdungog sa Senate Blue Ribbon Committee niadtong Lunes nga siya ang tag-iya sa mga kompanyang miapil sa mga bidding sa mga proyektong gipondohan sa gobyerno.
Kalakip sa mga gibawian og lisensiya ang St. Gerard Construction General Contractor and Development Corporation, Alpha and Omega General Contractor and Development Corporation, St. Timothy Construction Corporation, Amethyst Horizon Builders and General Contractor and Development Corporation ug lain pang upat ka mga kompanya sa kontraktor.
Sumala sa PCAB nga ang pag-angkon no Discaya nagpakita sa usa ka “scheme” sa joint o multiple bidding participation nga naglayong impluwensiyahan ang resulta sa mga public bidding, maniobrahon ang sangputan, ug masolo ang mga proyekto sa gobyerno, nga babag sa mga balaod labot sa procurement ug sa mga rekisitos sa lisensiya.
Photo courtesy to: Sarah Discaya
