Gipahibalo ni Indonesian President Prabowo Subianto niadtong Domingo, Agosto 31, 2025, nga nagkauyon na ang mga political parties sa nasud nga bawi-on ang pipila ka mga benepisyo ug pribilehiyo sa mga miyembro sa parliyamento. Kini nga desisyon gisundan sa dakong protesta nga mitultol sa pagkamatay sa lima ka indibidwal, nga giisip nga pinakagrabe sulod sa daghang katuigan.
Nagsugod ang protesta niadtong Lunes batok sa sobra nga suweldo ug housing allowance sa mga magbabalaod. Misamot ang tensyon niadtong Biyernes human mapatay ang usa ka motorcycle ride-hailing driver sa kamot sa kapulisan atol sa protesta.
Nasunog ang pipila ka mga balay sa mga opisyal ug mga pampublikong building, nga nagdala og dakong kabalaka sa publiko ug nakaapekto sa pag-ubos sa stock market ug bili sa salapi sa Indonesia.
Sumala ni Prabowo, apil sa mga tangtangon ang dagkong allowance sa mga magbabalaod ug ang ilang mga biyahe sa gawas sa nasud.
Gimanduan usab niya ang militar ug kapulisan nga hugtanong subayon ug dakpon ang mga nalambigit sa pagpangdaot, pagpangawat, ug kagubot. Gitawag pa niya ang pipila sa mga lihok isip simbolo sa “terorismo.”
Gikansela usab ni Prabowo ang iyang nakatakdang biyahe paingon sa China aron tutukan ang sitwasyon. Nabantayan nga ang mga opisyal naggamit na og kasagarang plaka sa ilang mga sakyanan, usa ka lakang aron malikayan ang kasuko sa publiko.
Samtang, wala pa klaro kung kinsa gyud ang responsable sa halapad nga kagubot ug kabangis nga misunod sa mga protesta.
Sumala sa mga lider sa estudyante, dili pa igo ang pagbawi sa benepisyo sa mga magbabalaod, ug posible pa nga adunay sunod nga mga protesta.
Photo courtesy of ndtv.com
