Gisulong sa Houthi rebels ang mga buhatan sa United Nations sa kapital sa Yemen nga Sanaa ug gidakop ang 11 ka personnel sa UN.
Sumala ni U.N. Secretary-General Antonio Guterres, pwersahang misulod ang Houthis sa World Food Programme, gikumpiska ang mga kabtangan sa UN ug gisulayan usab pagsulod ang ubang opisina sa UN sa kapital.
Gilusad sa Houthi rebels ang maong raid human sa hinanaling atake sa Israel sa Sanaa niadtong Huwebes nga nakapatay sa prime minister sa Yemen nga si Ahmed Ghaleb Nasser al-Rahawi ug uban pang ministro.
Sumala usab ni UN Special Envoy for Yemen Hans Grundberg, gipriso ang 11 ka staff sa UN sa Sanaa ug sa port city sa Hodeidah.
Kini dugang pa sa 23 ka ubang UN staff nga gidakop na sukad pa niadtong 2021 diin usa kanila ang namatay samtang nagpabilin sa prisohan karong tuiga.
Apil sa mga buhatan sa UN nga nagbase sa duha ka gikatahong siyudad ang UNICEF, UN Development Programme ug opisina sa UN High Commissioner for Refugees.
Photo courtesy to:Newsweek
