Misaad ang lider sa North Korea nga si Kim Jong Un nga ihatag ang “maayong kinabuhi” alang sa mga pamilya sa mga sundalong North Korean nga napatay samtang nakig-away alang sa Russia sa gubat batok sa Ukraine.
Sumala sa taho sa state media sa North Korea gibuhat ni Kim ang pahayag human kini makigkita sa mga pamilya sa mga sundalo ug iyang gipadayag ang kaluoy ug kasubo sa pagkamatay niini.
Gipakita usab sa state television sa North Korea nga miluhod pa sa atubangan ni Kim ang mga pamilya sa sundalo nga nag-antos og daku nga kasakit sa pagkawala sa ilang hinigugma.
Sumala sa usa ka dokumentaryo nga gipasalida sa North Korea, ang ilang mga tropa miapil sa gitawag nga “Operation Kursk Liberation” aron palagpoton ang mga pwersa sa Ukraine gikan sa rehiyon sa Kursk sa Russia, apan wala pa kini mapamatud-an sa mga independent agency nga nagmonitor sa gubat.
Nakumpirma usab sa report nga gipadala ni Kim ang mga sundalo sa Russia niadtong Agosto 2024, duha ka bulan human kini mopirma og kasabutan sa depensa uban ni Russian President Vladimir Putin.
Diin mitungha nga kapin sa 600 sa 15,000 ka sundalo sa North Korea ang namatay, sumala sa intelligence sa South Korea.
Mas taas ang pagtantiya sa Western intelligence nga miabot na og 6,000 ang tanang casualties.
Sa pagkakaron, nakatakda nga magkita pag-usab si Kim ug si Putin sa China sa umaabot nga semana sa usa ka military parade isip paghinumdom sa paghuman sa World War II.
Photo courtesy to: kyodo news
