Giaprobahan na sa South Korea ang usa ka balaod nga nagdili sa paggamit sa mga cellphone ug uban pang digital nga gamit sulod sa mga classroom sa tanang tunghaan sa nasud sa korea, sugod Marso sa tuig 2026.
Gitumong sa maong balaod ang pagpakunhod sa negatibong epekto sa sobrang paggamit sa social media sa mga kabatan-onan. Ang balaodnon gisugyot ug gisuportahan sa duha ka partido sa parliyamento, taliwala sa nagkadako nga kabalaka kabahin sa ”addiction” sa social media sa mga estudyante.
Matod ni Cho Jung-hun, usa ka oposisyon nga mambabalaod ug co-author sa maong balaod, giingon nga daghang kabatan-onan karon sa nasud ang nagbilar sa paggamit sa social media platforms sama sa Instagram, nga nakaapekto sa ilang panglawas ug pag-eskwela.
Base sa datos sa Education Ministry, 37% sa mga estudyante sa middle ug high school ang misulti nga naapektuhan na ang ilang adlaw-adlaw nga kinabuhi tungod sa social media, samtang 22% ang nag-ingon nga makasinati sila og grabe nga kabalaka kung dili sila makagamit niini.
Bisan pa man og daghan ang tunghaan sa South Korea nga adunay kaugalingong pamalaod sa paggamit og cellphone, apan ang bag-ong balaod naghatag og opisyal nga mandato sa pagpatuman niini sa tibuok nasud.
Tugutan lamang ang paggamit sa digital devices sa mga estudyanteng adunay kabilinggan sa panglawas o kung gamiton kini sa edukasyonal nga katuyoan.
Apan, adunay pagsupak ang pipila ka youth advocacy groups, nga miingon nga basin kini makalapas sa katungod sa mga bata, ilabi na sa ilang access sa impormasyon ug teknolohiya..
Photo courtesy of uc health
