Gibutyag sa mga eksperto ang usa ka klase sa kahoy nga giila nga labing mahal sa kalibutan ang Lapnisan o Agar Wood nga anaa mismo sa yutang Pilipinhon ug nagkantidad og kapin sa lima ka milyon ka pesos matag kilo.
Ang Lapnisan, nga nailhan usab sa internasyonal nga ngalan nga Agar Wood, giisip karon nga pinakamahal nga kahoy sa kalibutan. Adunay presyo nga moabot sa ₱5,000,000.00 matag kilo, kini nga kahoy gigamit sa paggama og mahalong pahumot, insenso, ug uban pang produkto nga gi-export ngadto sa merkado sa Asya, Middle East, ug Europa.
Sumala sa kasaysayan, ang Agar Wood giingong gigamit sa cremation sa Buda base sa Nirvana Sutra, ug gitudlo usab nga gigamit isip pahumot kang HesuKristo subay sa Bag-ong Tugon sa Biblia.
Tungod niini, gitawag kini sa ubang nasud nga “Heavenly Wood”.
Makaplagan ang Lapnisan sa pipila ka suok sa Pilipinas, labi na sa mga lugar nga aduna pay dagkong kalasangan. Apan dili kini ordinaryong kahoy kay aron matawag nga Agar Wood, kinahanglan nga ang kahoy maboslotan og natural nga impeksyon, nga moporma og itom nga resin sa sulod. Mao kini ang gi-extract ug giproseso nga nahimong mahalong produkto.
Sa kasamtangan, daghang mga Pilipinong lumulupyo sa kabukiran ang nakapahimulos sa industriya sa Lapnisan, nga nahimong tinubdan sa ilang kalamboan ug panginabuhian.
Apan, nagpadayon usab ang kabalaka sa ilegal nga pagpangahoy ug walay tarong nga pagpananom, nga nagbunga og panawagan alang sa responsableng pagdumala ug legal nga pagproseso sa kahoy.
Photo courtesy of amazon
