Gi-angkon ni Pangulong Ferdinand R. Marcos Jr. nga usa na ka dako nga hagit sa nasud ang nagkadako nga isyu sa online gambling, gawas pa sa kalihokan sa mga sindikato nga nagamit sa artificial intelligence ug digital currency aron sa pagpanglimbong ug pagpangilad sa katawhan.
Sumala sa Presidente, padayon ang paningkamot sa gobyerno aron maprotektahan ang publiko batok sa mga modus. Apil niini ang pagmugna sa Anti-Financial Account Scamming Act, pagtukod sa E-Commerce Bureau alang sa mga reklamo ug tabang online, ug ang pagpatuman sa SIM Registration Act aron malikayan ang peke nga transaksyon.
Lakip usab sa mga lakang sa administrasyon ang paghatag og training alang sa mga Pilipino kabahin sa AI, cybersecurity, ug e-commerce. Sa laing bahin, gisugdan na usab sa gobyerno ang pagpahunong sa access sa pipila ka mobile apps ug websites nga gigamit sa sugal, aron mapanalipdan ang publiko ug mapalig-on ang seguridad sa financial system sa nasud.
Photo credit to:PNA
