𝗣𝗜𝗟𝗢𝗧𝗢 𝗡𝗔𝗛𝗜𝗠𝗢𝗡𝗚 𝗛𝗘𝗥𝗢 𝗛𝗨𝗠𝗔𝗡 𝗡𝗔𝗞𝗔𝗣𝗔-𝗔𝗡𝗔𝗞 𝗨𝗚 𝗨𝗦𝗔 𝗞𝗔 𝗕𝗨𝗡𝗧𝗜𝗦 𝗦𝗨𝗟𝗢𝗗 𝗦𝗔 𝗘𝗥𝗢𝗣𝗟𝗔𝗡𝗢

Wala gilauman sa usa ka piloto gikan sa nasud Thailand nga sya nag-trending human niya gitabangan ang usa ka babaye nga pasahero nga nanganak tunga-tunga sa panganod.

Gipadagan ang flight sa piloto nga si Jakarin Sararnrakskul gikan sa Taipei, Taiwan paingon sa Bangkok, Thailand dihang gipahibalo siya sa usa ka tripulante nga adunay pasahero nga manganakay sa eroplano.

Mibiya dayon si Jakarin sa flight ug gitugyan kini sa iyang co-pilot aron adtoon ug susihon ang kahimtang sa pasahero nga manganak.

Nakahukom si Jakarin nga tabangan ang iyang pasahero nga manganak gumikan walay duol nga tugpahanan diin siya ihatod.

Samtang, luwas nga gipanganak ang usa ka batang lalaki nga ilang gihinganlan og “Sky Baby”. Human sa pagkanaog sa eroplano, ang inahan ug ang bata gidala dayon sa usa ka ospital sa Thailand diin maayo ang kahimtang sa duha.

Mapasigarbuhon usab si Jakarin sa iyang nahimo ug nag-post og litrato sa social media kauban ang bag-ong natawo nga bata.

Gikabiliban sab sa mga netizens ang maong piloto nga nahimo matud pang hero sa paghimog paanak sa iyahang pasahero.