Nibarog ang Commission on Elections (COMELEC) nga kining mga puwesto makonsiderar nga temporaryong bakante alang sa pagpahigayon sa Bangsamoro elections tungod sa padayong kakuwang sa katin-awan kalabot sa parliamentary seat nga gireserba kaniadto para sa probinsiya sa Sulu. Magpabiling bakante ang pito ka mga puwesto ug walay eleksiyon alang sa mga representante sa distrito gikan sa Sulu.
Dugang pa, ang desisyon kung unsaon pagpuno niini nga mga puwesto itugyan sa ubang mga sanga sa gobyerno.
Usa sa mga rason sa pag-postpone sa BPE gikan sa Mayo 12 ngadto sa Oktubre 13 mao ang pagpagawas sa desisyon sa Korte Suprema nga ang probinsiya sa Sulu wala maapil sa BARMM.
Ang Bangsamoro Parliament kinahanglang mag-amendar una sa Bangsamoro Parliamentary Districts Act of 2024 ug magdesisyon kon unsay buhaton sa pito ka mga puwesto sa Sulu.
Subling gipasabot ni COMELEC Chairman George Erwin Garcia nga madayon ang piniliay sa Oktubre 13 diin 73 na lang ka mga puwesto ang mapilian.
