Nipasidaan ang Philippine Space Agency (PhilSA) nga ang mga debris gikan sa Long March 7 rocket nga gilusad sa China posibleng nahulog sa West Philippine Sea (WPS) niadtong Martes sa buntag, Hulyo 15, 2025.
Sumala sa ahensya, posibleng nahulog ang mga debris sa pipila ka drop zones nga gibanabana nga 33 nautical miles gikan sa Bajo de Masinloc, 88 nautical miles gikan sa Cabra Island sa Occidental Mindoro, 51 nautical miles gikan sa Recto Bank, ug 118 nautical miles gikan sa Busuanga, Palawan.
Ang mga detalye bahin sa posibleng pagkahulog sa mga rocket debris gipagawas sa wala pa kini gilusad sa China pinaagi sa usa ka pahibalo sa mga airmen isip pasidaan sa mga kalihokan sa paglupad sa kahanginan.
Bisan tuod wala gipaabot nga mahulog ang mga rocket debris sa kabalayan, ang PhilSA nipasidaan sa posibleng kapeligrohan niini sa mga barko, ayroplano, ug mga sakayan sa pangisda sa palibot sa giila nga drop zones. Adunay posibilidad usab nga kini molutaw ug maanod paingon sa silingang mga baybayon.
Kalabot niini, subling giawhag sa ahensya ang publiko nga mo-report sa lokal nga awtoridad kung adunay makit-an nga gidudahang mga rocket debris ug dili kini atimanon tungod sa peligro nga mga materyales niini.
