Gihatagan og ₱4 milyon nga pinansyal nga tabang ug nagkadaiyang kagamitan ang 40 ka barangay sa pito ka lungsod sa Sarangani aron mapalig-on ang serbisyo ug matubag ang panginahanglan sa matag komunidad.
Personal nga gipangulohan ni Governor Rogelio “Ruel” Pacquiao ang turnover ceremony niadtong Nobyembre 3 sa Provincial Capitol, pinaagi sa Ronda Probinsya-Sarangani Barangay Affairs Unit.
Lakip sa gipanghatag ang ₱4 milyon nga pinansyal nga tabang alang sa 20 ka barangay, 240 ka solar light sets alang sa 24 ka barangay, 255 ka monobloc chairs alang sa pito ka barangay, ug 35 ka rolyo sa water pipes alang sa tulo ka barangay.
Gipasiugda ni Pacquiao ang padayong panag-uban sa provincial government ug mga opisyal sa barangay aron masiguro nga direktang matubag sa mga programa ang panginahanglan sa mga residente.
Gidumala ang kalihokan ubos sa Socio-Civic Projects Fund – Bawat Barangay Makikinabang Program sa Office of the President, uban sa pagtambong sa mga lokal nga opisyal ug Accredited Community Disaster Volunteers.
Photo courtesy: PLGU Sarangani
