Gipalig-on sa mga tag-iya ug operator sa water refilling stations o WRS sa Davao de Oro ang ilang kahibalo sa mga saktong pamaagi ug regulasyon sa paghatag og luwas nga tubig mainom.
Kini human gipahigayon ang unang Provincial Water Refilling Station Owners and Operators Congress sa Molave Hotel Tagum City, niadtong Setyembre 29, 2026. Ang kalihukan gitambongan sa mga Water Refilling Station owners ug operators sa probinsya.
Gihisgutan atol sa kalihukan ang mga regulasyon sa Department of Health kabahin sa water supply systems ug Philippine National Standards for Drinking Water, lakip ang mga requirement sa retail establishments nga gilatid sa Department of Labor and Employment.
Gipresentar usab ang Annual Report sa Provincial WRS Federation, samtang gihatagan og gibug-aton ang panginahanglan sa mas lig-on nga koordinasyon tali sa mga WRS operators, ilang pederasyon ug sa Probinsyal nga Panggamhanan aron masiguro ang padayong paghatag og limpyo ug luwas nga tubig ug malikayan ang mga sakit nga mahimong resulta sa kontaminadong tubig.
