Gipadayag sa singer nga si KZ Tandingan nga wala pa siya hingpit nga andam sa pagbaton og anak bisan pa og mas andam na niini ang iyang bana nga si TJ Monterde, human nilang hisgutan ang ilang plano sa pamilya atol sa ilang guesting sa “Gandang Gabi Vice” ni Vice Ganda.
Matud ni KZ, aduna pa siyay mga pangandoy nga gustong matuman sa iyang career ug personal nga kinabuhi isip babaye sa dili pa siya mosulod sa yugto sa pagka-inahan. Gipasabot usab niya nga gusto niyang masiguro nga andam siya sa emosyonal ug personal nga aspeto sa pag-atiman sa usa ka bata, tungod kay dili igo nga adunay pinansyal nga kapasidad aron matawag nga andam na sa pagkaparent.
Gipasalamatan usab ni KZ ang iyang bana nga si TJ tungod sa pagsabot ug pagrespeto sa iyang kaugalingong panahon, bisan pa man sa tinguha niini nga mahimong amahan. Matud ni TJ, dili mahimong iyang desisyon lamang ang pagbaton og anak tungod kay silang duha ang mahimong ginikanan. Dugang pa niya, malipay na siya sa ilang kinabuhi isip magtiayon bisan wala pa silay anak, apan usa ka dakong panalangin kon hatagan sila niini sa umaabot.
Photo courtesy: Spotify
