Mariing pinabulaanan ng Pamahalaang Bayan ng Shariff Aguak ang kumakalat sa social media na umano’y nagkaroon ng kaguluhan sa bayan nitong Setyembre 29, 2026. Ayon sa lokal na pamahalaan, walang katotohanan ang naturang impormasyon at agad itong bineripika ng mga opisyal ng barangay kasama ang mga Barangay Peacekeeping Action Team o BPAT.
Batay sa isinagawang pag-iinspeksyon at beripikasyon, walang naitalang kaguluhan, karahasan o anumang insidente ng bakbakan sa mga barangay sa nabanggit na oras. Nanatiling payapa, ligtas at normal ang sitwasyon sa lugar, at nagpapatuloy ang karaniwang pamumuhay ng mga residente.
Gayunman, sinabi ng lokal na pamahalaan na nagkaroon ng tensyon sa isang sitio sa isang barangay, ngunit agad itong na-neutralize sa pamamagitan ng pagtutulungan ng mga punong barangay, mga kumander ng MILF at Coordinating Committee on the Cessation of Hostilities o CCCH-MILF. Nilinaw na walang nangyaring bakbakan.
Pinaalalahanan naman ang publiko na huwag agad maniwala o magbahagi ng impormasyon na hindi pa beripikado, dahil maaari itong magdulot ng takot, pangamba at kalituhan. Hinikayat ang mga residente na sumubaybay lamang sa opisyal na Facebook page ng Bayan ng Shariff Aguak at makipag-ugnayan sa mga awtoridad para sa anumang paglilinaw.
Samantala, sinabi ng lokal na pamahalaan na nakikipag-ugnayan na ito sa mga kinauukulan upang matukoy ang pinagmulan ng kumakalat na maling impormasyon at posibleng magsagawa ng kaukulang legal na hakbang.
Photo courtesy: PNA, Shariff Aguak Municipality FB page
