Nasikop sa kapulisan atol sa gilusad nga buy-bust operation ang usa ka lalaking kusinero pasado alas 7:58 sa gabii niadtong Setyembre 28, 2026 didto sa Purok Doña Rosa, Barangay Central, Mati City, Davao Oriental.
Ang suspetsado naila nga si alyas “Kenneth”, 31 anyos, ulitawo ug residente sa Prk. Malinawon-2, Dumping, Brgy. Matiao sa maong dakbayan. Ang operasyon gihimo sa mga personahe sa Mati City Police Station, kauban ang PIU DOPPO, PDEA ug nakuha gikan sa suspek ang 1.392 gramos nga gibug-aton sa gidudahang shabu nga adunay standard drug price nga Php9,456.00. Lakip usab sa nasakmit ang usa ka P500 pesos nga buy bust money.
Human sa pagdakop gipahibalo ang akusado sa rason sa iyang pagkasikop pinaagi sa pinulongan nga nasabtan ug nahibal-an. Samtang giimbentaryo ug gimarkahan sa lugar sa nahitaboan ang mga nakumpiskang ebidensya uban sa mga testigo ug sa suspek mismo.
Sa pagkakaron ang dinakpan anaa na sa kustodiya sa Mati City Police Station alang sa hustong disposisyon ug mag atubang sa kasong paglapas sa RA 9165 kun Comprehensive Dangerous Drugs Act of 2002.
