Nasikop sa buy-bust operation sa kapulisan ang usa ka 18-anyos nga lalaki nga giila sa Police Station 1 isip High-Value Individual o HVI, sa Brgy. Estefania, Bacolod City, niadtong nakalabay nga adlaw.
Gipahigayon ang operasyon sa mga personnel sa Police Station 1, Bacolod City Police Office (BCPO) ubos sa pagpanguna ni PMAJ Eugene G. Tolentino, Station Commander.
Ang nadakpan usa ka 18-anyos nga lalaki, single ug residente sa Barangay Estefania, Bacolod City, nga giingong dili listed sa Barangay Anti-Drug Abuse Council o BADAC.
Nasakmit sa operasyon ang usa ka dako nga sachet sa gituohang shabu nga adunay gibug-aton nga mokabat sa 75 gramos ug uban pang mga drug paraphernalia. Gibana- banang mokabat sa php 510k ang Standard Drug Price niini.
Ang mga nakumpiskang ebidensiya gi-secure, gi-inventory ug gidokumento, ug gipailalom sa laboratory examination subay sa hustong proseso ug mga probisyon sa balaod.
Matud sa BCPO, magpadayon ang ilang mga operasyon batok sa iligal nga droga samtang ilang gipasidunggan ang due process ug katungod sa tanang mga tawo nga nalambigit sa operasyon.
Ang nadakpan nga suspek anaa na sa kustodiya sa kapulisan alang sa tukmang dokumentasyon ug legal nga proseso tungod sa giingung paglapas sa RA 9165 o Comprehensive Dangerous Drugs Act of 2002.
