Misaka ngadto sa P13.24 kada kilowatt-hour ang overall residential rate sa Davao Light alang sa billing period gikan Setyembre 11 hangtod Oktubre 10, 2026, gikan sa P12.90/kWh sa niaging billing period.
Gipasabot sa Davao Light nga ang pagsaka sa singil tungod sa mas taas nga presyo sa Wholesale Electricity Spot Market o WESM, nga nalambigit sa hugot nga power supply sa Mindanao, ilabi na panahon sa taas nga panginahanglan sa kuryente.
Aron mapagaan ang epekto sa taas nga WESM prices, gimandoan sa Energy Regulatory Commission o ERC ang regional implementation sa Secondary Price Cap o SPC sa Visayas ug Mindanao grids, retroactive sa Agosto 2026. Gimando usab sa ERC ang recalculation sa market settlements aron maaplikar ang adjusted charges sa mga bayronon sa kustomer.
Samtang, nakakuha usab ang Davao Light og pag-apruba gikan sa ERC nga i-defer ang usa ka bahin sa generation charges aron kini makolekta pinaagi sa installment imbes nga dunganon ang bayad.
Gipahinumdoman ang mga konsumidor nga mahimong mag-usab-usab ang power rates matag billing period ug gidasig ang pagpraktis sa energy efficiency aron makontrol ang konsumo ug binuwan nga bayranan.
Photo Courtesy: Davao Light and Power Co.
