Nadakpan ang tulo ka indibidwal, samtang kapin ₱1.3 milyon nga kantidad sa gasolina ang nakumpiska sa operasyon sa CIDG batok sa gituohang illegal nga pagbaligya og petrolyo sa Barangay Bolocboloc, Sibulan niadtong Setyembre 25, 2026.
Sumala sa CIDG, ang maong operasyon gilunsad human makadawat og napamatud-ang impormasyon kabahin sa gituohang walay awtorisasyon nga pagbaligya og gasolina sa usa ka gasolinahan.
Giingong ang tulo ka nadakpan mga empleyado sa establisyemento ug nagbaligya og gasolina ang walay Department of Energy o DOE Certificate of Compliance. Nakumpiska usab ang duha ka fuel dispensing machines nga adunay gasolina, nga gigamit isip ebidensiya.
Ang maong operasyon gilunsad ubos sa Batas Pambansa Blg. 33, nga giamyendahan sa Presidential Decree 1865, batok sa dili awtorisadong pagbaligya ug pag-apod-apod sa produktong petrolyo.
Gipasalig sa CIDG nga magpadayon ang operasyon batok sa ilegal nga fuel trading, lakip ang hoarding ug profiteering, ug giawhag ang publiko nga ireport ang susamang kalihokan sa mga otoridad.
Photo courtesy: CIDG
