Patay ang usa ka 26-anyos nga lalaki nga residente sa San Carlos City human maaksidente samtang nagsakay sa iyang motorsiklo sa National Highway sa Barangay Refugio, Calatrava, Negros Occidental, alas-7:40 sa gabii niadtong Domingo, Setyembre 27, 2026.
Giila ang biktima nga si Kevin Anob Bauya, 26 anyos, ulitawo ug residente sa Sitio Matiraa, Barangay Rizal, San Carlos City, Negros Occidental.
Base sa inisyal nga imbestigasyon, padulong sa San Carlos City ang biktima sakay sa iyang motorsiklo sa dihang pag-abot niini sa maong lugar, aksidenteng nabanggaan niini ang usa ka sako sa graba ug reflective warning device nga gibutang sa daplin sa dalan tungod sa nagpadayong konstruksyon.
Tungod sa impact, nawad-an og kontrol ang biktima sa iyang motorsiklo ug mi-slide kini sa dalan sa gilay-on nga mokabat sa 55 metros. Nalabay ang biktima sa sementadong dalan ug nakaangkon og grabeng mga samad ug bun-og sa nagkalain-laing bahin sa iyang lawas, ilabina sa ulo.
Gitabangan dayon ang biktima sa Calatrava MDRRMO ug gidala sa Calatrava District Hospital alang sa medikal nga pagtagad. Apan, gideklarar siya nga dead on arrival o DOA sa nag-atiman nga doktor.
