Arestado sa kapulisan ang usa ka 55-anyos nga lalaki human gi-tigbas ang usa ka 66-anyos senior citizen nga misangpot sa kamatayon niini sa Purok 28-C, Kawayanan, Barangay Madaum, Tagum City, alas 6:20 niadtong nakalabay nga adlaw.
Base sa inisyal nga imbestigasyon, nakadawat og impormasyon ang Bismuth Base mahitungod sa maong insidente. Dali dayon nga girespondehan sa mga personahe sa Mobile 04 ngadto sa lugar sa insidente ug nasikop ang suspek.
Giila ang biktima nga si alyas “Lucrenio”, 66 anyos, minyo, ug residente sa giingong lugar. Samtang ang suspek giila nga si alyas “Marcelo”, 55 anyos, minyo, ug residente usab sa maong lugar.
Matud sa imbestigasyon, ang suspek gikan sa panagtapok sa balay sa ilang silingan ug mipadulong sa balay sa biktima. Didto, naglalis ang duha tungod sa usa ka naunang panagbangi hangtod nga gi-tigbas sa suspek ang biktima sa nagkalain-laing parte sa lawas gamit ang “sundang,” nga narekober usab sa kapulisan gikan sa suspetsado.
Girespondehan dayon sa City Disaster Risk Reduction and Management Office (CDRRMO) ang insidente, apan wala na madala sa ospital ang biktima tungod sa klaro nga wala nay kinabuhi gumikan sa tinigbasan.
Miabot usab ang mga personahe sa Davao Norte Provincial Forensic Unit (DNPFU), alang sa crime scene processing, documentation, ug pagkolekta sa mga posibleng ebidensya.
Sa pagkakaron, anaa na sa kustudiya sa Tagum City Police Station ang dinakpan samtang giandam ang tukmang kaso batok kaniya.
