Gisaulog nga malipayon ang family day sa lgu Tagum, ang “Tour Around the World” nga temang gibida sa gipahigayong City Employees Family Day and Larong Pinoy niadtong milabay’ng adlaw atol sa selebrasyon sa 126th Philippine Civil Service Anniversary, sa Apokon Energy Park.
Sumala sa lokal nga panggamhanan sa Tagum nga importante ang Family Day isip higayon aron mapalig-on ang relasyon sa pamilya, nga nagsilbing pundasyon sa matag kawani sa pagpadayon sa matinud-anong serbisyo publiko.
Misamot ang kasadya pinaagi sa nagkadaiyang kompetisyon matag cluster, ilabi na sa mga Larong Pinoy with a twist, diin aktibong mipartisipar ang mga empleyado sa syudad.
Gipakita usab sa matag cluster ang ilang pagkamamugnaon pinaagi sa booth competition, diin ang Developers ang gideklarang Best Booth sa maong selebrasyon.
Malipayon usab nga nakigbahin ang mga kabataan sa gipahigayong “Kids Entertainment” nga giandam alang kanila, lakip ang magic tricks ug padula nga nakadugang sa kasadya sa maong paghandom.
Pinaagi sa tinuig nga Family Day celebration, gipalig-on ang panaghiusa sa mga kawani ug ilang mga pamilya, samtang gipasiugda ang panag-uban isip pundasyon sa mas lig-on nga serbisyo publiko.
Photo Courtesy: City Government of Tagum
