Arestado ang duha ka lalaki nga nasakpan nga gigamit ang usa ka ambulansya sa pagkarga sa mga smuggled nga sigarilyo atol sa checkpoint operation sa kapulisan sa pagpanguna sa Kapatagan Municipal Police Station sa Purok 1, Bansarvil 1, Kapatagan, Lanao del Norte.
Giila ang mga suspek nga ua ka 31-anyos, driver ug 19-anyos nga pasahero, mga residente sa Purok 8, Poblacion, Sultan Naga Dimaporo, sakop ning probinsya.
Subay sa report, nga atol sa checkpoint operation gipahunong ang ambulansya sa 2nd Provincial Mobile Force Company o 2nd PMFC nga nagbiyahe pa gikan sa Sultan Naga Dimaporo padulong sa lungsod sa Kapatagan.
Atol sa inspeksyon, nakit-an sulod sa sakyanan ang 22 ka master cases sa New Far Red cigarettes ug lima ka master cases sa laing klase sa sigarilyo nga gibanabanang mokabat sa P1.08 milyon.
Sa pagkakaron, anaa na sa kustodiya sa 2nd PMFC ang mga nakumpiskang sigarilyo ug ang gigamit nga sakyanan samtang gihulat ang pormal nga turnover niini ngadto sa Bureau of Customs o BOC alang sa hustong disposisyon ug legal nga aksyon.
Photo Courtesy: PNP PCADG Northern Mindanao
