Nasikop sa kapulisan ang usa ka hamtong nga lalaki atol sa buy-bust operation batok sa iligal nga droga sa District 6, Barangay Poblacion, Mabuhay, Zamboanga Sibugay, niaging adlaw.
Sumala sa Mabuhay Municipal Police Station, gipahigayon sa ilang drug enforcement team ang operasyon nga misangpot sa pagkadakop sa suspek, nga giila sa kapulisan nga street-level individual ug residente sa lungsod sa Mabuhay.
Nakuha gikan sa suspek ang upat ka gagmay nga pakete sa gituohang shabu nga gibana-banang motimbang sa usa ka gramo ug adunay standard drug price nga Php 6,800.Nakuha usab ang marked money nga 500 pesos, usa ka piraso nga aluminum foil ug lighter.
Gihimo ang marking ug inventory sa mga nakumpiskang butang sa lugar sa operasyon, atubangan sa usa ka barangay official ug media representative. Ang suspek gidala sa Mabuhay MPS alang sa hustong disposisyon, samtang ang mga nakumpiskang drug items gipadala sa Zamboanga Sibugay Provincial Forensic Unit alang sa qualitative ug quantitative examination.
