Mipirma og Memorandum of Agreement (MOA) si Surigao del Sur Governor Johnny Pimentel uban sa Philippine Amusement and Gaming Corporation (PAGCOR) ug Department of Education (DepEd) alang sa pagtukod og bag-ong eskwelahan nga nagkantidad og ₱55 milyon sa Tagbina Elementary School sa lungsod sa Tagbina.
Gipahigayon ang pagpirma sa kasabutan sa Manila, diin kauban ni Governor Pimentel si PAGCOR Chairman ug Chief Executive Officer Alejandro Tengco ug Education Secretary Sonny Angara.
Sumala kang Gov. Pimentel, pinaagi sa maong panagtambayayong, makabenepisyo ang mga estudyante ug magtutudlo sa Tagbina tungod sa mas luwas ug mas angay nga pasilidad alang sa pagtudlo ug pagkat-on.
Gipasiugda usab sa gobernador nga padayon ang provincial government sa paghatag og prayoridad sa edukasyon ug sa pagpalambo sa mga oportunidad alang sa kabataan sa Surigao del Sur.
Dugang pa niya, kabahin ang proyekto sa paningkamot nga madala ang dekalidad nga imprastraktura sa mga komunidad ug masiguro nga adunay tukmang pasilidad ang mga estudyante aron masuportahan ang ilang pag-eskwela.
Samtang, sumala sa laing pahayag sa DepEd, ang maong proyekto kauban sa PAGCOR gilauman nga makabenepisyo sa kapin 49 ka pampublikong eskwelahan sa tibuok nasud ug target nga mahuman sa tuig 2027.
Photo courtesy: Gov. Johnny Pimentel Facebook
