Nakadawat og dagkong pasidungog ang dakbayan sa Tandag atol sa 2026 Caraga Regional Nutrition Awarding Ceremony isip pag-ila sa makanunayon ug maayong pagdumala sa mga programa alang sa nutrisyon.
Lakip sa labing dakong pasidungog nga nadawat sa dakbayan mao ang prestihiyosong Nutrition Honor Award (NHA), ang pinakataas nga pag-ila nga gihatag ngadto sa mga lokal nga pangagamhanan nga nagpakita og talagsaon ug makanunayon nga pagpatuman sa mga programa sa nutrisyon.
Gipasidunggan usab ang mga miyembro sa nutrition team sa Tandag tungod sa ilang tagsa-tagsa ka kalampusan. Si Mary Joy G. Ongayo, Registered Nutritionist-Dietitian (RND), nakadawat og pasidungog alang sa iyang makanunayon nga maayong pagserbisyo isip 2024 National Outstanding City Nutrition Action Officer.
Samtang si Rhygy G. Pude, Registered Nurse (RN), gihatagan og pasidungog isip Regional Outstanding City Nutrition Program Coordinator. Nahimo usab nga nominado si Jean R. Cuartero alang sa Regional Outstanding Barangay Nutrition Scholar, isip pag-ila sa iyang kontribusyon sa pagpatuman sa mga programa sa nutrisyon sa Barangay Dagocdoc.
Personal nga gidawat ang mga pasidungog uban ni Tandag City Mayor Roxanne C. Pimentel ug City Councilor John Paul C. Pimentel, lakip si Barangay Dagocdoc Punong Barangay Ireneo Zafra.
Gibutyag usab sa lokal nga panggamhanan nga ang maong mga pasidungog nagtimaan sa laing kalampusan sa dakbayan sa Tandag sa pagpakita sa ilang padayong paningkamot sa pagpalambo sa mga programa sa nutrisyon alang sa kaayohan sa katawhang Tandaganon.
Photo courtesy: City Government of Tandag
