Opisyal nang binuksan ang bagong Professional Regulation Commission o PRC-BARMM Satellite Office sa CityMall Cotabato.
Pinangunahan ng mga opisyal mula sa PRC Central at Regional Offices, kasama ang mga kinatawan ng Bangsamoro Government, ang seremonya ng pagpapasinaya sa bagong pasilidad.
Layunin ng pagtatatag ng satellite office na mas mapalapit sa publiko ang mga serbisyo ng PRC, mapabilis ang pagproseso ng mga transaksyon, at matiyak ang mas madali at episyenteng pagkuha ng mga kinakailangang serbisyo para sa mga propesyonal at aplikante.
Sa pamamagitan nito, inaasahang magiging mas maginhawa ang pag-aasikaso ng mga dokumento at iba pang transaksyong may kaugnayan sa Professional Regulation Commission.
Makikinabang sa bagong satellite office ang libo-libong propesyonal at mga aplikante sa licensure examination mula sa Cotabato City, Maguindanao del Norte, Maguindanao del Sur, at iba pang karatig-lalawigan sa Bangsamoro Autonomous Region in Muslim Mindanao o BARMM.
Dahil sa pagbubukas ng nasabing pasilidad, hindi na kailangang bumiyahe nang malayo ang mga kliyente upang personal na asikasuhin ang kanilang mga transaksyon sa PRC, na inaasahang makatutulong upang makatipid sila sa oras, pamasahe, at iba pang gastusin.
