Patuloy na tinutupad ng 72nd Infantry o Gabay Battalion, sa ilalim ng 10th Infantry Agila Division ng Philippine Army, ang kanilang misyon sa pagpapanatili ng kapayapaan at seguridad sa Cotabato City kasunod ng matagumpay na pagsasagawa ng 2026 Bangsamoro Autonomous Region in Muslim Mindanao o BARMM Parliamentary Election.
Sa kabila ng pagtatapos ng electoral deployment ng ilang mga tauhan, nananatili sa lungsod ang Gabay Troopers upang mapanatili ang mataas na kahandaan sa seguridad, sa pakikipag-ugnayan sa Joint Task Force Central, Philippine National Police o PNP, at iba pang katuwang na yunit ng Armed Forces of the Philippines o AFP.
Sa isinagawang send-off ceremony bago ang deployment para sa halalan, binigyang-diin ni Major General Alvin V. Luzon, Commander ng 10th Infantry Agila Division, ang mahalagang tungkulin ng mga sundalo sa pangangalaga sa integridad ng proseso ng halalan.
Ayon kay Luzon, malinaw ang kanilang misyon na pangalagaan ang proseso, itaguyod ang batas, at panatilihin ang kapayapaan.
Samantala, sinabi ni Lieutenant Colonel Pablo M. Masa-ad, Commanding Officer ng 72nd Infantry Battalion, na hindi nagtapos sa pagbibigay-seguridad sa mga polling center at election paraphernalia ang kanilang tungkulin. Patuloy aniya ang kanilang pangako na tiyaking ligtas at panatag ang mga mamamayan ng Cotabato City.
Kaugnay nito, hinihikayat ng 72nd Infantry Battalion ang mga residente na manatiling kalmado at mapagmatyag, iwasang magpakalat ng mga impormasyong hindi pa beripikado, at agad na iulat sa pinakamalapit na himpilan ng pulisya, military detachment, checkpoint, o kinauukulang tanggapan ng pamahalaan ang anumang kahina-hinalang gawain.
Patuloy namang isinasabuhay ng Gabay Troopers ang kanilang paninindigan sa paglilingkod nang may disiplina, propesyonalismo, at katapatan para sa kapayapaan at seguridad ng Cotabato City.
