Padayon ang Department of Trade and Industry–Davao de Oro Provincial Office sa pagmonitor sa presyo ug suplay sa Basic Necessities and Prime Commodities o BNPCs sa probinsya.
Alang sa monitoring niadtong Setyembre 21 hangtod 25, 2026, gilakip sa mga batakang panginahanglanon ang de-latang sardinas, processed milk, instant coffee, asin, sabon panglaba ug kandila.
Samtang sa mga prime commodities, gilakip ang de-latang karne, suka, toyo, patis, sabon panglawas ug baterya. Gihimo ang maong price monitoring subay sa Price Act o Republic Act No. 7581, nga gi-amendahan pinaagi sa Republic Act No. 10623, aron mapanalipdan ang mga konsumante ug mamonitor ang kahimtang sa presyo ug suplay sa importanteng palaliton.
Dugang pa ang padayon nga monitoring sa presyo ug suplay sa batakang palaliton sa DTI-Davao de Oro usa ka importante nga lakang aron mapanalipdan ang mga konsumidor. Pinaagi niini, masiguro nga ang mga presyo sa mga importanteng produkto makatarunganon ug adunay igo nga suplay sa merkado, dako usab ang papel sa DTI sa pagtabang sa mga negosyante ug mga mamalitay aron malikayan ang pagpahimulos ug pagsaka sa presyo nga walay hustong basehan.
Isip mga konsumidor, importante ang pagkahibalo sa presyo ug pagmonitor sa kalidad ug availability sa mga produkto. Dili lamang responsibilidad sa gobyerno ang pagpanalipod sa konsumidor; kinahanglan usab nga mahimong responsable ug maalamon sa pagpamalit. Ang regular nga monitoring sa DTI nagpakita nga pinaagi sa kooperasyon sa gobyerno, mga negosyante, ug publiko, mahimong mapadayon ang patas ug hapsay nga merkado.
