Landig sa balay tambalanan ang usa ka 34-anyos nga giila sa alyas nga “Miggy,” laborer ug residente sa Barangay Arado, Burauen, Leyte human kini gibuno ug gitigbas sa duha ka lalaki atol sa panaglalis didto sa naasoy nga lugar pasado alas-9:45 sa gabii niadtong Setyembre 25, 2026.
Base sa inisyal nga imbestigasyon sa kapolisan, nagsugod ang insidente sa dihang gipahimangnoan sa biktima si alyas “Christian,” 38 anyos, kabahin sa ilang mga iro. Misamot ang ilang panaglalis hangtod nga nagsinumbagay ang duha. Gituohang nakainom niadtong higayona si “Christian” ug napildi sa biktima. Gisundan kini sa pag-apil ni alyas “Jason,” 48 anyos, nga giingong armado og sundang ug maoy mibuno ug mitigbas sa biktima.
Human sa insidente, gidala sa mga paryente ang biktima ngadto sa Burauen District Hospital alang sa medikal nga pag-atiman. Samtang, nadakpan sa mga otoridad ang duha ka suspek, lakip ang narekober nga armas, ug gidala sila sa Burauen Municipal Police Station alang sa hustong disposisyon ug dugang nga imbestigasyon.
