Gidala sa ospital ang usa ka lalaki nga tindero human gibunalan og metal bar sa usa ka 40-anyos sa may alas 10:30 sa buntag niadtong Setyembre 25, 2026 sa Purok 15, Talipapa, Barangay Buru-un, Iligan City.
Subay sa report, nakadawat og tawag gikan sa usa ka concerned citizen ang naka duty nga pulis bahin sa usa ka kagubot sa maong lugar.
Nasayran, nga sa pag-abot sa kapulisan, nasuta nga nagsugod ang insidente sa init nga panaglalis tali sa duha kalabot sa ilang tagsa-tagsa ka pwesto sa pagpamaligya nga nisamot ang panaglalis hangtod nahimong pisikal nga komprontasyon.
Giingong mipunit ang suspek og usa ka round metal bar ug gibunalan ang biktima sa makadaghang higayon, hinungdan sa mga samad sa ulo ug mga kamot.
Gilayon nga gidala ang biktima sa City Hospital alang sa dinaliang medikal nga pag-atiman ug nagpabilin siyang naka-confine sa ospital diin gitambalan ang iyang mga samad.
Sa pagkakaron, ang suspek anaa sa kustodiya sa ICPS2 alang sa pag-andam sa tukmang kaso nga ipasaka batok kaniya.
Photo Courtesy: ICPO
