Gipasabot sa PhilHealth Iligan ug Lanao del Norte nga kung ang usa ka kwalipikadong PhilHealth beneficiary nga gusto magpa-check sa mata apan nabalaka tungod kay walay ikabayad, adunay PhilHealth Optometry Benefit Package nga angay mahibaloan.
Matud ni Patrick Peñaranda ang OIC sa PhilHealth Iligan nga ubos niini nga package, sakop ang vision assessment o pagsusi sa panan-aw, refraction, ug prescription eyeglasses lakip ang frame ug lenses.
Alang sa mga kwalipikadong beneficiary nga 0 hangtod 15 anyos, kung masuta nga adunay refractive error o kondisyon sa mata nga mahimong matul-id pinaagi sa prescription glasses, mahimo silang maka-avail sa maong benepisyo.
Ang package adunay PhilHealth coverage nga 2,500 pesos kada case, lakip ang facility ug professional o consultation fees, ug mahimo kining ma-avail kausa matag tuig, depende sa evaluation sa healthcare provider.
Dugang ni Peñaranda nga alang sa mga miyembro nga walay ikabayad, dili dayon hunahunaon nga dili na makapa-check sa mata ug ang unang lakang mao ang pagpangita og PhilHealth-accredited Optometry Benefit Package provider ug ipasusi kung kwalipikado ba sa maong benepisyo.
Kung adunay pangutana, mas maayong mangutana diretso sa PhilHealth LHIO Iligan/Lanao del Norte o sa PhilHealth-accredited optometry provider aron makumpirma ang inyong eligibility ug ang tukmang proseso sa pag-avail.
