Nakuha sa mga estudyante gikan sa Schools Division Office o SDO Cotabato, ang unang tulo ka pwesto sa Reel-silience Video Making Contest nga gipahigayon sa Office of Civil Defense Region 12, isip kabahin sa pagtapos sa National Disaster Resilience Month. Nakadaog og unang pwesto ang Basak National High School pinaagi kang Florence Mae Badiongan, nga nakadawat og 7,500 ka pesos nga cash prize ug pasidungog.
Kabahin niini, nakuha sa Villarica High School ang ikaduhang pwesto pinaagi kang Harrylane May Quiñones, nga nakadawat og 4,500 ka pesos ug pasidungog. Samtang ikatulong pwesto ang Greenfield National High School pinaagi kang Sherman Noel Pelonia, nga nakadawat og 3,500 ka pesos ug pasidungog. Ang tulo ka nag-unang mananaog gikan sa SDO Cotabato, samtang ang ubang finalist nga eskwelahan sa rehiyon gihatagan usab og consolation awards.
Gipakita sa mga video dili lamang ang pagkamamugnaon ug talento sa mga estudyante, kundili usab ang ilang paningkamot sa pagpasiugda sa disaster preparedness ug resilience. Pinaagi sa ilang mga obra, napadangat ang mensahe sa kahandam, kalig-on ug responsibilidad sa pag-atubang sa mga kalamidad. Giila sa SDO Cotabato ang kalampusan sa mga estudyante, isip pamatuod sa padayong pagpalig-on sa kultura sa kahandam ug kalig-on sa mga eskwelahan ug komunidad.
Photo courtesy: DepEd RXII SDO Cotabato Province
