Gipangulohan ni Governor Ann K. Hofer ang ocular inspection sa Guicam Bridge, isip kabahin sa padayong paningkamot sa Provincial Government sa pagpalambo sa mga importanteng imprastraktura ug pagkonektar sa mga komunidad sa Zamboanga Sibugay.
Ang maong proyekto maghatag og dugay nang gihulat nga permanenteng agianan paingon sa Olutanga Island, nga direktang magkonektar sa Sitio Hula-Hula, Barangay Poblacion, Mabuhay, ngadto sa Sitio Guicam, Barangay Dawa-Dawa, Alicia.
Giubanan ang gobernador nila ni Provincial Administrator Atty. Christian Jay Millena, Provincial Engineer Engr. Christopher Lazo, Zamboanga Sibugay Police Provincial Director PCOL Barnard Danie V. Dasugo, Barangay Captain Jayson T. Omamalin, ug mga lider sa barangay. Personal nga gisusi ni Governor Hofer ang kahimtang ug progreso sa proyekto.
Gilauman nga pinaagi sa Guicam Bridge mas mahimong luwas ug sayon ang pagbiyahe sa mga residente, lakip na ang pagbalhin sa mga produkto ug mga serbisyo. Gilauman usab nga makatampo kini sa kalihokan sa lokal nga ekonomiya ug makahatag og dugang oportunidad sa mga komunidad sa Olutanga Island.
Photo credit: Lambo pa Sibugay
