Gipalig-on ang kampanya sa Land Transportation Office o LTO Ipil batok sa pagmaneho ubos sa impluwensya sa alkohol, pinaagi sa padayon nga pagpahinumdom sa mga motorista sa peligro nga dala niini sa ilang kaugalingon ug sa ubang naggamit sa dalan.
Pahimangno sa LTO Ipil, dili garantiya nga luwas ang usa ka motorista tungod lamang kay gibati niya nga “kaya pa” niya ang pagmaneho human makainom. Ang alkohol mahimong makaapekto sa atensyon, koordinasyon ug abilidad sa hustong pagdesisyon samtang nagmaneho.
Giawhag ang mga nakainom nga dili na mogunit sa manibela. Mahimo nilang ihatag ang yawe sa kauban, mag-book og ride, o mangita og laing luwas nga paagi aron makauli.
Dugang pamahayag sa LTO Ipil, mas maayo nang maulahi sa pagpauli kaysa mameligro ang kinabuhi. Sumala pa ang biyahe mahimong mapulihan, apan ang kinabuhi dili na mabalik.
