Naghatag og P5,000 nga cash reward ang General Santos City Water District o GSCWD sa usa ka indibidwal nga mitabang sa pagdakop sa usa ka tawo nga giakusahan sa pagpangawat og water meter sa Barangay Labangal, General Santos City niadtong Septiyembre 3, 2026.
Nasakpan ang suspetsadong kawatan human kini gi-citizen’s arrest samtang giingong gikawat ang water meter nga gibutang sa gawas sa usa ka establisyemento sa maong barangay.
Sumala sa GSCWD, ikaduhang higayon na kini nga nakahatag sila og pinansyal nga ganti alang sa tabang sa pagdakop sa suspetsadong kawatan og water meter.
Nagsumite usab ang GSCWD og complaint-affidavit sa Office of the City Prosecutor, ug nakit-an niini nga adunay igo nga basehan aron ipadayon ang kaso.
Sukad 2023, kapin usa ka libo o 1,032 na ka water meter ang gikatahong gikawat. Naghatag ang GSCWD og P5,000 nga reward alang sa kwalipikadong impormasyon o tabang nga mosangpot sa pagdakop sa kawatan, samtang P25,000 ang ganti alang sa impormasyon batok sa mga establisementong namalit og gikawat nga water meter.
Giawhag sa GSCWD ang publiko nga magmatngon ug i-report dayon ang mga kahina-hinalang kalihokan.
Photo courtesy:GSC Water District
