Nangayo ang Pagadian Federation Tricycle Operators and Drivers Association (PAFTODA) ngadto sa 15th City Council sa syudad sa Pagadian nga hatagan ug igong pagtagad ang ilang giduso nga petisyon sa usbaw sa pletihan.
Matud ni PAFTODA President Arnold Catalino, halos lima ka bulan na nilang giduso ang petisyon sa usbaw pletihan sa tanang mga tricycle ug bao-bao drivers wala pa gihapon nahatagan ug pagtagad.
Gisaysay ni Catalino, ang pagpasaka sa pletehan nagkinahanglan ug saktong taripa aron dili maglisod sa pagpatuman ang tanang mga driver ug dili usab malipat ang mga pasahero kabahin sa minimum nga pletehan sa syudad.
Malaumon si Catalino nga matuki ug mahatagan na og aksyon sa konseho ang ilang petisyon, ilabina halos lima ka bulan na ang paghulat sa mga driver sa usbaw pletihan.
Gipahayag usab sa grupo nga andam silang makigtambayayong sa LGU Pagadian aron masulbad ang ilang mga kabalaka ug makab-ot ang patas ug maayong solusyon sa ilang mga hangyo.
