Midaog si Jurace Sy Tejano, 6th grade pupil sa Lugan Central Elementary School sa T’boli, South Cotabato, ang unang pwesto sa Regional World Food Day 2026 On-the-Spot Poster Making Contest nga gipahigayon niadtong Septiyembre 19 sa GreenLeaf Hotel, General Santos City.
Napildi ni Tejano ang 23 ka batan-ong artists nga nagrepresentar sa walo ka school divisions sa SOCCSKSARGEN Region. Tungod sa iyang kadaugan, siya ang mahimong opisyal nga representante sa rehiyon sa national-level competition nga gitakdang ipahigayon sa Oktubre 15, 2026.
Giorganisa ang maong kompetisyon sa Department of Agriculture–Regional Field Office XII pinaagi sa Regional Agriculture and Fishery Information Section, ubos sa tema nga “Innovate today. Nourish tomorrow,” nga nagtumong sa pagpalambo sa creativity ug kahibalo sa mga kabataan bahin sa food security.
Gipasiugda usab ni Agricultural Program Coordinating Officer alang sa General Santos City ug Sarangani nga si Jocelyn Misterio ang importansya sa pag-apil sa mga kabataan sa agricultural activities aron masiguro ang umaabot nga food security.
Sumala kang Misterio, importante nga maapil ang mga batan-on ug mga hamtong sa agricultural production, ilabi na aron sayo pa lang mapalambo ang ilang kahibalo bahin sa food production, sustainability ug agricultural innovation.
Ang maong poster-making contest kabahin sa pag-obserbar sa World Food Day nga ginasaulog matag Oktubre 16 pinaagi sa Food and Agriculture Organization sa United Nations o UN-FAO. Tumong niini nga mapataas ang kahibalo sa publiko bahin sa kagutom, malnutrition ug sustainable agriculture. Nakadawat si Tejano og 8,000 pesos nga cash prize ug plaque isip unang gantimpala.
Samtang, nakakuha sa ikaduhang pwesto si Tauler Zodrine Vilbar nga nakadawat og 5,000 pesos, ug ikatulong pwesto si Kester Serentes nga nakadawat og 3,000 pesos. Ang ubang partisipante nga wala nakadaog nakadawat usab og 1,000 pesos ug certificate isip pag-ila sa ilang pag-apil.
Lakip sa mga hurado sa kompetisyon sila Prof. Ariel Sadulang sa University of Southern Mindanao–Kabacan, visual artist ug police officer Aurelius Gallego, ug visual artist ug information officer Joshua Lloyd Blas.
Photo courtesy: Agri Tayo Soccsksargen
